មានលុយអាចប្រើខ្មោចឱ្យកិនម្សៅបាន-អ្នកលក់ពូកែអាចប្រើឆ្កែឲ្យលក់ជំនួសបាន
មានលុយអាចប្រើខ្មោចឱ្យកិនម្សៅបាន-អ្នកលក់ពូកែអាចប្រើឆ្កែឲ្យលក់ជំនួសបាន
 |
| វោហារសព្ទ-មានលុយអាចប្រើខ្មោចឱ្យកិនម្សៅបាន-អ្នកលក់ពូកែអាចប្រើឆ្កែឲ្យលក់ជំនួសបាន |
វោហារសព្ទខ្មែរ
មានលុយអាចប្រើខ្មោចឱ្យកិនម្សៅបាន
ដូចដែលយើងដឹងគ្រប់ៗគ្នាហើយថា ជនជាតិខ្មែរយើងចូលចិត្តប្រើសម្ដីដែលមានលក្ខណៈប្រៀបធៀបដើម្បីបង្ហាញអំពីលក្ខណៈន័យនៃអ្វីមួយ ហើយការប្រើនោះមានលក្ខណៈប្រកបដោយសត្យានុមតិ។ តែគួរឱ្យស្ដាយ មានអ្នកវោហារសព្ទមួយចំនួនមិនយល់អំពីការប្រើប្រាស់វោហារសព្ទនិងបង្កើតវោហារសព្ទខ្មែរ បែរជាប្រើឱ្យតែផ្ដាស ដោយមិនយល់អំពីទំហៀបន័យក្នុងផ្នត់គំនិតសង្គមខ្មែរ។ បើតាមសង្កេត ដោយសារតែអ្នកទាំងនោះមិនសូវជាអានសៀវភៅខ្មែរទេ ភាគច្រើនអានភាសាបរទេស ដូច្នេះហើយបានជាពួកគេប្រើពាក្យដែលបកប្រែចេញពីភាសាទាំងនោះ។ ដូចក្របីដែលគេបកប្រែចេញពីរឿងថៃ ដែលស្ដែងន័យថាមនុស្សល្ងង់ ដែលខ្មែរយោយល់ថាជាមនុស្សខ្មៅ ប៉ុន្តែខ្មែរល្ងង់គឺ គោឬអាជៃ ប៉ុន្តែបែរជាប្រែតាមគេទាំងស្រុងតែម្ដង។
ថ្មីៗនេះមានលេចចេញនូវវោហារសព្ទថ្មីមួយទៀតដែលប្រើទំហៀបន័យដោយប្រើពាក្យថាឆ្កែ។ បើសិនជាយើងមើលទៅលើន័យដែលខ្មែរយល់ស្ដីអំពីឆ្កែ គឺខ្ជិល ថោកទាប ស្មោះនឹងម្ចាស់។ ទោះបីជាស្ដែងន័យច្រើនក៏ដោយក៏ខ្មែរយល់ន័យធៀបដំបូង គឺថោកទាប។ ដូចក្នុងសម្ដីថា'អាឆ្កែ'។ ដូច្នេះបើសិនជាយើងយោងទៅលើវោហារសព្ទរបស់សៀវភៅមួយនោះ យើងអាចទាញជាយោបល់បានដូច្នេះថា៖ ១-ចេះប្រើមនុស្សខ្ជិល ចេះប្រើមនុស្សថោកទាប ចេះធ្វើឱ្យស្មោះនឹងម្ចាស់ក្រុមហ៊ុនឬម្ចាស់, ២-ការលក់នោះជាការលក់ប្រកបដោយអសីលធម៌ ត្បិតអ្នកលក់សុទ្ធតែជាប្រភេទដូចលេខ១។
រីឯសំនួរវោហារសព្ទបុរាណយើងវិញ មានលុយប្រើខ្មោចឱ្យកិនម្សៅក៏បាន។ ដែលប្រើពាក្យខ្មោចដើម្បីតំណាងឱ្យមនុស្សដែលនៅក្រោមឱវាទធ្វើអ្វីមួយ។
តើខ្មោចជាអ្វី?
ខ្មោច បើមើលតាមរូប គឺខោច ដែលអាចមកពី ខូចឬខើច។ មានអ្នកភាសាវិទ្យា គេយល់ថាមកពីពាក្យ ខូច ហើយដូចស្រៈ(ូ)ជាស្រៈ(ោ) ហើយដាក់ផ្នត់ជែក(ម)ដើម្បីស្ដែងន័យជាមនុស្ស ; ខូច + ម៑ > ខ្មូច > ខ្មោច គឺអ្នកខូច មនុស្សខូច ចំពោះនេះពិតជាសមហេតុសមផល។ រីឯខ្មោច ដែលស្ដែងន័យថាមនុស្សដែលស្លាប់នោះ អាចមកពីពាក្យ ខើច(គឺមិនដល់ឬស្ទើរ) ហើយប្រើផ្នត់ជែក(ម) បានជា ខ្មើច ដូច (ើ) ជា (ោ) ទៅជា ខ្មោច។ ចំពោះដំណូរស្រៈ នេះយើងមើលលើពាក្យ សើច(អានថា សោច)។ ទោះបីជាពាក្យខ្មោច មកពីពាក្យឫសណាក៏ដោយចុះក៏ស្ដែងន័យប្រហាក់ប្រហែលគ្នាដែរ តែមិនស្ដែងន័យថាមនុស្សស្លាប់នោះទេក្នុងវោហារសព្ទខាងលើ គឺមនុស្សដែលខូច ដែលស្ទើរភ្លើង ដែលខិលជាដើម។ យើងអាចបញ្ជាក់ពាក្យខ្មោចក្នុងន័យខាងលើបានដូចជា៖ ក- អាខ្មោច គឺសំដៅដល់មនុស្សដែលបានតែនិយាយមិនឃើញលទ្ធផល ដែលពូកែអួតឱ្យគេខ្លាច។ ខ-ខ្មោចអាចុក(ចុកជាឈ្មោះមនុស្ស) សំដៅដល់មនុស្សដែលគ្មានបានការ គេលែងត្រូវការ។ ពោល គឺមនុស្សដែលគ្មានប្រយោជន៍ដល់សង្គមឬភូមិស្រុក។
ដូច្នេះ មានលុយប្រើខ្មោចឱ្យកិនម្សៅបាន គឺគេប្រើមនុស្សខិលខូច គ្មានប្រយោជន៍ ឱ្យធ្វើការងារដែលស្រួល ដែលចំណាយពេលច្រើន ដែលគួរឱ្យធុញ ចំពោះមនុស្សទូទៅមកធ្វើជំនួយ ហើយការងារនោះមិនប៉ះពាល់ដល់អ្វីឡើយ។
យោបល់ បើយោងទៅលើបំណកស្រាយខាងលើ អ្នកប្រើវោហារសព្ទ គួរតែចេះប្រើ ចេះបង្កើត ដោយស្របទៅតាមផ្នត់គំនិត និងលក្ខណៈន័យ។
ញ៉.ផល្លី-សុផេន
១៤ ឧសភា ២០២១
Comments
Post a Comment