សម្រែកទូកង

ហេតុអ្វីទូកងត្រូវស្រែក?

ចំពោះអ្នកដែលចូលចិត្តទូកមិនជាពិបាកឆ្លើយទេ គឺដើម្បីកម្លាចិត្ត និងបង្កើនភាពរំពងអឺងកង។ ប៉ុន្តែនៅមានចំណុចជាច្រើនទៀតដែលយើងត្រូវលើកយកមកពិភាក្សារកហេតុផល។

ទូកចែវ

១. ដំណើរការដាក់ទូកចុះពីលើបង្គង ជាធម្មតាទូកមានជំនាងកាត់ជាព្រលឹកព្រាយ អ្នកតា ... ដូច្នេះជាធម្មតាគេលេងភ្លេងថ្វាយឬក៏មានបញ្ជាន់រូបផងដែរ។ ពេលគេធ្វើពិធីទាក់ទងនឹងព្រលឹងហើយ គេលើកទូកចេញពីបង្គង។ មុនលើកចេញចំណុះត្រូវចូលស្នែងតាមខ្ទងនៃទូករៀងៗខ្លួន ប៉ុន្តែសព្វថ្ងៃមានរទេះអូសដូច្នេះមិនសូវជាសែងទេ ទោះបីជាយ៉ាងណាក៏ចំណុះនៅតែនៅអបសងខាងទូកដើម្បីទប់។ មានមនុស្សម្នាក់អាចជាអ្នកបក់ក្បាលទូកឬអ្នកដែលគេយល់ថាល្អស្រែកឡើង៖ 

យក្សអរ..., ចំណុះស្រែក ហ៊ើ/អើយ។ 

ចំពោះទូកខ្លះស្រែកបន្ថែមទៀត៖ 

យក្សខឹង..., ចំណុះស្រែក ហ៊ឺ...។ អ្នកផ្ដើមគ្រហឹមតប ហ៊ឺ! ចំណុះតបវិញ ហ៊ឺ។ 

ថាដូច្នេះគម្រប់៣ដងទើបគេលើកទូកចុះទឹក។ ពេលគេចាប់ផ្ដើមចុះអុំទូក ចំណុះចុះអង្គុយក្នុងទូកពេញហើយ អ្នកបក់ក្បាលស្រែកមុនចេញដំណើរដូចករណីខាងលើដែរ។ បន្ទាប់មកអ្នកក្បាលឱ្យចំណុះអុំថយយកទី ពេលចេញពីកំពង់ល្មមនឹងប្រះឡើងទៅខាងលើយកទីហើយ គេចាប់ផ្ដើមក្រោកឈរនៅផ្នែកខាងក្រោយដែលហៅថាជ្រោង។ ហើយអ្នកបក់ក្បាលស្រែក៖

មួយយូវ...អូ(?យក)! ចំណុះស្រែក៖ មួយ ពីរ បី។ 

គេស្រែកដូចនេះរហូតដាច់ផុតអ្នកមើល ហើយគេអង្គុយជ្រុំច្រវារហូតដល់កន្លែងទីបត់។ ពេលបត់ហើយ គេរៀបចំជ្រោងផ្នែកខាងក្រោយ ហើយអ្នកបក់ក្បាលទូកគោះក្រឡោកោបីបួនដង ហើយស្រែក៖ 

មួយយូវ...អូ! ចំណុះស្រែក៖ មួយ ពីរ បី។ មួយ ពីរ បី។ មួយ ពីរ បី។ ចំណុះអាចស្រែក៣ឬប្រាំដងតាមចង្វាក់ដែលទូកគេរៀបចំ។ ហើយអ្នកបក់ក្បាលស្រែកឡើងម្ដងទៀត អ្នកចំណុះបន្ទរឡើងបន្តទៀត។ គេធ្វើយ៉ាងនេះជាច្រើនដងរហូតដែលទីព្រត្រ។

ពីចាប់ផ្ដើមដល់បញ្ចប់ គេមានចង្វាក់ឬកណ្ដង់ផ្សេងៗគេ។ ឧទាហរណ៍៖ អ្នកបក់ក្បាលស្រែក៖

មួយយូវ...អូ ចំណុះស្រែកមួយពីរបី, មួយពីរបី, មួយពីរបី។ មួយយូវ...អូ ចំណុះស្រែកមួយពីរបី, មួយពីរបី, មួយពីរបី។ ជាប់គ្នាដប់ដងជាង។ ពេលជិតដល់ទី គេស្រែក ចាក់ទៅ!, ទាញ!, ឱន! សាប់! យូវទៅ! ជាដើម

ពេលគេដល់ទីហើយ គេឈប់អុំ ហើយបណ្ដោយទូកឱ្យទៅមួយខ្យល់ទើបគេប្រះឡើងមកវិញដើម្បីអុំមួយជើងទៀតឬក៏ចូលកំពង់វិញ។ ករណីគេអុំមកចូលកំពង់ អ្នកបក់ក្បាលស្រែក៖ 

យក្សអរ...! ចំណុះស្រែក៖ អ៊ើ... (ថាយ៉ាងនេះបីដង) អ្នកបក់ក្បាលបញ្ចប់ ហ៊ើយ...។ 

លក្ខណៈមនុស្សដែលអង្គុយក្នុងទូកហៅថាចំណុះទូក។

+ អ្នកបក់ក្បាល / អ្នកក្បាល / អ្នករាំក្បាលទូក - មនុស្សដែលនៅមុខ ជាធម្មតាមិនអុំទេ គឺសម្រាប់បញ្ជាចង្វាក់អុំទូក (លើកលែងទូកខ្នាតអន្តរជាតិ២២នាក់)

+ ស្មាឯក ជាមនុស្សម្នាក់ឬពីរនាក់អង្គុយអុំនៅបន្ទាប់ពីអ្នកបក់ក្បាលទូក។ មនុស្សនេះជាអ្នកនាំចង្វាក់សម្រាប់អ្នកខាងក្រោយជាបន្តបន្ទាប់។

+ អ្នកខាងមុខ គឺចំណុះដែលរាប់ពីស្មាឯកទៅក្រោយប្រហែល៨ឬ១០ខ្នងតាមទូកវែកខ្លី។ ចំណុះនេះ គឺអង្គុយអុំ។

+ យោងរាំង ជាមនុស្សដែលលុតជង្គង់អុំបន្ទាប់ពីអ្នកអង្គុយអុំ។ ហើយមនុស្សនេះអ្នកដឹកនាំអុំអ្នកខាងក្រោយខ្លួន។

+ អ្នកជ្រោង / អ្នកឈរអុំ គឺចំណុះដែលរាប់ពីយោងរាំងដល់យោងគៀប។

+ អ្នកយោងគៀប ជាចំណុះដែលជួយទប់ទូកនិងកាច់ចង្កូត។ ជាធម្មតាមានពីរឬ៣នាក់។

+ អ្នកកាច់ចង្កូតឬអ្នកកន្សៃ ជាចំណុះចុងក្រោយគេ មាននាទីកាច់ចង្កូត។

ក្រៅពីអ្នកទាំងនេះ មានអ្នកបាចទឹកទូក មានអ្នកស្រែកចង្វាក់។

ហេតុអ្វីគេស្រែក? 

បើយោងលើពាក្យ យក្សអរ គឺកម្លាចិត្តឱ្យមានកម្លាំងដូចយក្ស។ យក្សខឹង... អ៊ឺ គឺកម្លាចិត្តឱ្យខឹងចង់ចូលអុំ។ 

ញ៉.ផ.សុផេន

១៨ វិច្ឆិកា ២០២៤